domingo, 16 de novembro de 2008

´Os señores do vento´ recibe o Premio Galicia do festival de cine de Vilagarcía





O pasado sábado, 14 de novembro, no Auditorio de Vilargarcía, Xurxo González, director d´Os señores do vento, recibiu o Premio Galicia da XXXVI edición do Certame Liceo-Casino de Vilagarcía de Arousa, o festival de cinema máis antigo de Galicia.

Na Gala de Clausura do festival arousano Xurxo González recibiu o trofeo de mans do Manuel José Fernández Iglesias, Director Xeral de Comunicación Audiovisual pertencente a Presidencia da Xunta de Galicia. Despois do acto a curtametraxe foi proxectada no espectacular novo Auditorio Multiusos de Vilagarcía de Arousa onde o público asistente conectou, con enorme facilidade, co humor e o optimismo que fan gala os seus protagonistas: Chacurro e José María.
Segundo as palabras de Xurxo González que intentan explicar este éxito: “Os señores do vento unicamente ten como feito destacable: mirar a realidade que pasa por diante da porta da túa casa con outros ollos. O único que procurei foi darlle algo de pouso a filmación e que nela quedara prendada algo do entusiamo da xente que mira as botellas xirar en vivo. Conseguido isto non se sabe se estás enfronte dunha reportaxe, dun documental contemplativo, dunha documentación audiovisual dunha obra de arte ou dunha película de ciencia-ficción”.
Sen dúbida, escoitaremos falar aínda máis cousas sobre Os señores do vento onde, aos poucos, se está a propagar polo mundo o seu optimismo vital e o seu hedonismo condensado na súa célebre máxima: “eu por un vaso non vou se fora por unha botella…”

1 comentário:

teatrodominho disse...

Parabéns Xurxo... por divulgar e prestixiar por aí fora a realidade social e cultural desta nosa Vila. Parabéns tamén, claro, aos xa míticos Jose Maria e Chacurro...